- 39 -

1364. April 22.

Urbanus episcopus servus servorum dei Dilecto filio . . Abbati Monasterij in Andreow Cracouiensis dioc. Salutem et apostolicam benedictionem. Sua nobis dilecti filij . . Abbas et Conventus Monasterij in Ruda Cisterciensis ordinis Vrat. dioc. petitione monstrarunt, quod olim ipsi Nobilem virum Iohannem Ducem Vswinczuensem, qui de Abbatisuilla, de Ludouiciuilla et de Petriuilla villas Crac. dioc. ad eosdem Abbatem et Conventum iusto titulo pertinentes, et in quarum possessione pacifica ijdem Abbas et Conventus extiterant, contra iusticiam spoliaverat, dictasque villas occupaverat et detinebat prout detinet occupatas, fructus redditus et proventus percipiens ex eis, super hoc petendo dictas villas sibi adiudicari ac eundem Ducem ab eis amoveri seque ad ipsas restitui et reintegrari, coram Decano ecclesie Glogouiensis dicte dioc. Conservatore eisdem Abbati et Conventui contra inferentes eis iniurias et iacturas super bonis et rebus ipsorum a sede apostolica per ipsius sedis litteras deputato, et habente cognoscendi de hijs que iudicialem requirunt indaginem, specialem per easdem litteras potestatem. huiusmodi litterarum vigore traxerunt in causam, et tandem Prepositus ecclesie Oppoliensis dicte Wrat. dioc. cui prefatus Decanus causam huiusmodi, postquam in ea ad nonnullos actus inter partes ipsas processerat, audiendam commiserat et fine debito terminandam, cognitis huiusmodi cause meritis et iuris ordine observato pro dictis Abbate et Conventu diffinitivam sententiam promulgavit iusticia exigente. Quare prefati Abbas et Conventus nobis humiliter supplicarunt, ut eandem sententiam apostolico dignaremur munimine roborare. Quocirca discretioni tue per apostolica scripta mandamus, quatinus sententiam ipsam sicut est iusta facias auctoritate nostra appellatione remota firmiter observari. Datum Auinione x kal. Maij Pontificatus nostri Anno Secundo.
Registrata Gratis.
A. Alexandri.
Auf der Rückseite: Lambertus de Orsoy.

Die Bleibulle ist verloren.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.